Advertisement
ዛሬ ባይኑ የገባ፣ በጆሮው የላከው
ነገ ነበር ሆኖ፣ ንብረት እየሆነው
ነበር እያጋጨ ያልነበር ያፈልቃል
በነበሩ መጠን
የፈጠራው ወሰን
ይሰፋል፤ ይጠባል::
አለ እንዴ!?
ድንጋዮች ሳያጋጭ ከምንም ነገር ላይ
እሳት ያፈለቀ?
ወፍ ሚባል ሳያይ
ስላየር ላይ መስፈፍ በራሱ ያወቀ?
ያስብ ነበር እንዴ!?
አንድ ወጥ የሆነ አለት፣ ድንጋዩን ፍልፈላ
ግንደ ቆርቁር ባያይ ቅዱስ ላሊበላ
የሚያሰፋው ሳይኖር የምናቡን ኬላ
ይመጣለት ነበር በዝምብሎ መላ?
እንጃ!
አረ ደሞ ማነው?
አብዮት ጀማሪ፣ ነጻነት አምጣቂ
አርነት መውጣትን ምድር ላይ ፈንጣቂ
ከወንድም አህዮች ባሳብ ተገንጥሎ
የነጻነት ማተብ በልቡ አንጠልጥሎ
ጎዳና የወጣ ሜዳ ላይ ሰፋሪ
ከሜዳ አ'ያ ቀድሞ ማን ነበር ያለ እሪ?
ደግሞስ!
የጥንት የሰው ልጆች ገና ሳሉ ፋራ
ገዥዎች ነን ብለው፣ ሳይለዩ ሳል ጎራ
ከዛፍ ዛፍ በመዝለል እየቆሉ ጭራ
ባንድነት ሲኖሩ ከፍጥረቱ ጋራ
ድንገት ቢያዩም አይደል የወፎቹን ጎጆ
ንድፉን ዱቅ ያረገው ጭንቅላት ኮርጆ?
መሰለኝ!
ታድያ!
በኛ ግድ አልባነት
የኛን ብቻ ስንኖር በስግብግብነት
ጥቅሙ ያልታወቀን ከተፈጥሮ አንዱ
መንምኖ መንምኖ ሲጠፋ ዘር ግንዱ
....... እንላለን እንዴ?
አንድ ቋንቋ ጠፋ አንድ እውቀት ጎደለ
ባናውቅም ከኗሪው ምን እንደገደለ?
ብቻ!
ተፈጥሮና እኛ ቋንቋችን ባቢሎን
ነው ብለን ስንኖር፣ ያልተግባባን መስሎን
ቅድመ ሙሌት ሆነው የሚያወሩት ቋንቋ
መነሻዎች ናቸው ከሰው ዘር ለነቃ!!!
